مشكلاتنا مع أولادنا في فترة الصيف

بتواجه مشكلات كتير مع أولادك في الأجازة الصيفية !!! 😧😧😧

ابنك بره طول الأجازة مع اصحابة ومعرفشي بيعمل ايه ؟؟ 😩😩😩

بنتك قافلة عليها أوضتها طول اليوم قاعدة علي النت ومتعرفيشي بتعمل ايه 😪😪😪

خليك معايا شوية 

السلام عليكم ورحمة الله .. الحمد لله والصلاة والسلام علي رسول الله وبعد  .. النهاردة حابب أتكلم معاكم عن حاجتين مهمين جداً :

1-    الصيف .

أهم حاجة بتشغلنا كأولياء أمور في الصيف مع أولادنا هي : إني ازاي أخلي أبني أو بنتي يغير جو من تعب ومجهود وضغط الدراسة قبل ما يرجعلها تاني وببدأ أدور علي مصيف كويس ، ويك إند ظريف كدة كل أسبوع ، سفرية لمكان مختلف كدة يغيرو جو .. مش ده اللي كلنا بنفكر فيه !!!

تمام كل ده كويس جدا .. بس فيه مشكلتين صغيرين ..

أ‌-        المشكلة الأولي : أنك بإحساسك ده ناحية إبنك انتا وصلتله مفهوم خاطئ جداً .. إن الدراسة دي زي السجن اللي بتقضي فيه فترة عقوبتك كل سنة من 1-9 لمثلاً 1-5 .. وعندك  بسسسسس شهرين ولا 3 إفراج تلحق تمتع فيهم نفسك وتستغل كل لحظة في المرح والضحك والفرفشة قبل ما ترجع للسجن ده تاني .. طيب .. حد يقلي : معني كدة إني أخليه يذاكر في الصيف وتبقي طول السنة ضغط ؟!!! إطلاقا مش ده المقصود .. المقصود بس إن السنة كلها تكون ترفيه مع دراسة .. ترفيه مع قراءة واطلاع .. ترفيه مع حفظ للقرآن اللي كتير من أولياء الأمور بينسوه في الأجازة مع برنامج الترفيه الكبير اللي الولاد بيجهزوله .. ترفية مع تعلم مطالعة لفيديوهات نافعة ومفيدة علي اليوتيوب مثلاً .. مواضيع زي إيه .. زي مثلاً : تاريخ مصر ، سيرة الرسول صلي الله عليه وسلم والصحابة ، زي فوائد لبعض الرياضات النافعة والمفيدة علشان يحبها ويستبدل الشات والفيس بوك والسهر علي الأفلام والأغاني اللي كلها بتبث قيم وقدوات سيئة لأولادنا وبتكون راسخة في أذهانهم .. بالشكل ده تكون السنة كلها شيء واحد .. في الدراسة ترفيه مع الدراسة والواجبات المدرسية .. وفي الأجازة ترفيه مع كل اللي قلناه بطريقة غيييييير فرضيه علي الولد .. يعني لو لقي الأبن معاملة ولي الأمر في الدراسة زي الأجازة عندي وقت للترفيه ، ووقت للخروج .. نغير جو شهريا في مكان ما ، _ دراسة وأجازة _ ومع كل ده مذاكرته ودروسه .. ولقي ولي الأمر في الأجازة نفس كمية الترفية وتغيير الجو وفقط نستبدل المواد الدراسية المقررة بحفظ لكتاب الله ، بفهم لسيرة النبي صلي الله عليه وسلم والصحابة ، بجلسة عائلية للأب مع الأسرة كلها ممكن نسميها جلسة فضفضة .. يبدأ فيها الأب يحكي عن نفسه وعن احساسه بأولاده وعن بعض الظروف والملابسات اللي بتحصله في شغله اللي تكون مفهومة للأولاد ويسمع الحلول لهذة الملابسات من زوجته ثم أولاده وينصت لها جيدا ويتصنع الإنبهار بها لتُكسب الولد الثقة بنفسه .. بهذا تفتح قلبه ليفضفض معك وتسمع كل ولد للنهاية دون أن تلح عليه وتستخرج منه ما بداخله بالأمر أو بالتهديد لتكسب ثقته .. إيه رأيكو تكون الجلسة الأسرية دي كل جمعة من كل أسبوع بعد قراءة سورة الكهف جماعة وسرد قصة من قصصها أو سبب النزول مثلاُ  ؟؟!!! بكدة الولد محسش بإنفصال في حياته في الدراسة عن الأجازة ولا إن الدراسة سجن والأجازة الإفراج زي ما قلنا سابقا ً .. دي كانت أول نقطة حبيت أتكلم معاكم فيها ..

النقطة الثانية ودي هتكلم معاكو فيها في حلقة ثانية بإذن الله . هي المشكلة اللي بتواجه كثير من الآباء والأمهات وبتواجهنا أكثر في فترة الأجازة وهي أن ابني بحاول معاه يحفظ القرآن مش عاوز .. بقول له يصلي بيهرب مني .. مبيسمعشي كلامي .. أخلاقه مع اخواته سيئة .. بيخرج مع اصحابه وبيسمع أغاني يعني ممكن نقول مستفزة .. ومفيش أي تغيير .. لدرجة إن فيه كثير من أولياء الأمور بيتمنوا تخلص الأجازة وتيجي الدراسة بس علشان ينشغل بالمذاكرة والمدرسة والواجبات عن الأنترنت اللي مش بيخليني أعرف هو بيشوف فيه إيه .. والأكونت بتاعه اللي برقم سري مش بيقولي عليه معرفشي ليه ... طبعا بعد عرض المشكلة ليكو بالشكل ده وكثير متوافق معايا إنها موجودة علي ارض الواقع .. أحب أقلكم إن المشكلة مش من الأبناء .. المشكلة من الآباء والأمهات .. طيب إيه الحل ؟؟ ده اللي هنعرفه في  البوست القادم بإذن الله تعالي .. شكرا لكم والسلام عليكم ورحمة الله وبركاته .

وده لينك الحلقة علي اليوتيوب في برنامج 5 مع حسن . 

https://www.youtube.com/watch?v=f9yv2weIXP4

 متنسوش تتفرجو عالحلقة عاليوتيوب ، وتعملوا   Like , Share , Subscribe .